Pezullohet tenderi 137 milionësh për KEK-un – Hykmete Bajrami ngre alarmin për skemë të mundshme korruptive

Pezullimi i tenderit prej mbi 137 milionë euro për “Rehabilitimin dhe Modernizimin e Njësisë A3” në Termocentralin Kosova A, vetëm një ditë para afatit përfundimtar për dorëzimin e ofertave, ka shkaktuar reagime të forta dhe dyshime serioze mbi mbarëvajtjen e procesit. Alarmin e ka ngritur deputetja e Lidhjes Demokratike të Kosovës (LDK), Hykmete Bajrami, e cila ka theksuar mungesën e transparencës dhe një sërë parregullsish të mundshme që mund të fshehin një skemë korruptive në këtë proces tenderues.

Sipas Bajramit, tenderi ishte zhvilluar në mënyrë të dyshimtë për muaj të tërë, me manipulime të dukshme në procedura, shtyrje të afateve dhe mungesë të dokumentacionit bazë si studimi i fizibilitetit dhe përshkrimi teknik i punimeve të kërkuara. Ajo thekson se operatorët ekonomikë kanë qenë të paqartë për natyrën dhe përmasat e punës që kërkohej të realizohej.

Deputetja e LDK-së ka publikuar disa nga elementet shqetësuese që e karakterizuan këtë tender:

Mungesë transparence: Nuk kishte dokumentacion bazik teknik apo fizibilitet, duke e lënë të paqartë objektin e punimeve.

Ndryshime dhe shtyrje të afateve: Procesi u ndryshua disa herë në mënyrë që ngre dyshime për manipulim.

Procesi me negocim: Edhe pse ishte tender i hapur, u parashikua që KEK do të negocionte me vetëm 6 ofertues të përzgjedhur, pa klauzola ndëshkuese për mospërmbushje të kontratës.

Ndikim në sigurinë energjetike: Njësia A3 përbën rreth 10% të kapacitetit prodhues të energjisë në vend, duke e bërë këtë investim strategjik për furnizimin stabil të energjisë.

Bajrami ka hedhur një sërë pyetjesh që sipas saj kërkojnë përgjigje urgjente:

Pse tenderi u pezullua në minutën e fundit, kur pritej mbyllja e procesit?

Kush u ankua dhe ku u dorëzua ankesa? A ekziston ndonjë procedurë ligjore që lejon ankesën një ditë para afatit për ofertim?

A po tentohet të fshihet ndonjë shkelje ligjore?

A po i jepet kohë ndonjë kompanie të favorizuar për të rregulluar ofertën?

Pse u fshinë ofertat nga sistemi dhe pse po kërkohet ridorëzimi i tyre?

Nëse tenderi kishte kaq shumë parregullsi, pse nuk u anulua plotësisht?

Sipas deputetes, pezullimi i tenderit nuk është një veprim përgjegjës institucional, por më tepër një manovër për ta rishfaqur të njëjtin proces me të njëjtat probleme dhe përfitues të dyshimtë.

“Tenderi duhet të anulohet plotësisht dhe të nisë një hetim i thellë për të gjithë aktorët e përfshirë në këtë skemë që ka aromë të qartë korrupsioni,” ka përfunduar Bajrami, duke paralajmëruar se qytetarët janë ata që po paguajnë çmimin më të lartë për ndërhyrjet e dyshimta në sektorin e energjisë – përmes importit të shtrenjtë dhe përfitimeve të jashtëzakonshme të tregtarëve të energjisë.

Ky rast e shton listën e dyshimeve mbi menaxhimin e fondeve publike dhe rëndon më tej barrën e kërkesave për hetim të pavarur dhe transparencë në projekte strategjike të energjisë në vend.